ஆ(ஹா)ராதனா!


னக்குத் தெரிந்து ஆராதனாபடத்துக்குப் பின்புதான் இந்திப் படங்களையும் ரசிக்கும் மனோபாவம் தமிழ்நாட்டில் வளர்ந்தது. ‘ஆராதனா’ ரிலீஸானபோது நான் எட்டாம் வகுப்பு படித்துக்கொண்டிருந்தேன். என் மனதில் முதன்முதலில் இடம் பிடித்த இந்தி நடிகர் ராஜேஷ் கன்னாதான். ‘மேரே சப்புனோக்கி ரானி கபு ஆயே கீது’ பாடலை மொழி தெரியாமல் தப்புத் தப்பாகவேனும் அடிக்கடி பாடி மகிழ்ந்திருக்கிறேன். இந்திப் பாடகர்கள் கிஷோர் குமார், முகம்மது ரஃபி ஆகியோரை ரசிக்கத் தொடங்கியதும் ‘ஆராதனா’ காலத்திலிருந்துதான்.

ராஜேஷ் கன்னாவுக்கு 70-களில் தமிழ்நாட்டில் மிகப் பெரிய ரசிகர் பட்டாளம் இருந்தது. குறிப்பாக, ரசிகைகள் அதிகம்! ரத்தத்தால் கையெழுத்திட்டுக் கடிதம் அனுப்பும் அளவுக்கு அதி தீவிர ரசிகைகள் அவருக்கு இருந்ததுபோல் வேறு எந்த நடிகருக்காவது இருந்திருப்பார்களா என்பது சந்தேகம்தான். ‘ஒரு படப்பிடிப்புக்காக சென்னை வந்திருந்த ராஜேஷ் கன்னாவைப் பார்ப்பதற்காக, அவர் தங்கியிருந்த ஹோட்டலுக்கு நடு ராத்திரி சுமார் 600 பெண்கள் வரை வந்திருந்ததைக் கண்டு ஆடிப் போனேன்என்று ஒரு பேட்டியில் சொல்லியிருக்கிறார், அப்போது அவருடன் சென்னை வந்திருந்த இந்தி நடிகை மும்தாஜ். இவரும் ராஜேஷ் கன்னாவும் இணைந்து நடித்த பல படங்கள் சூப்பர் டூப்பர் ஹிட்! ராஜேஷ் கன்னாவும் மும்தாஜும் நடித்த ‘ஆப் கி கஸம்’ படத்தில்ஜெய் ஜெய் ஷிவ ஷங்கர்பாடல்,தோ ராஸ்தே’ படத்தில் ‘பிந்தியா சம்க்கேகி’, ‘சுப் கயே ஸாரே’ எனப் பலப்பல பாடல் காட்சிகளை எத்தனையோ முறை பார்த்து ரசித்திருக்கிறேன்.

கிஷோர் குமார் அதிகம் பின்னணி பாடியது ராஜேஷ் கன்னாவுக்குதான். 92 படங்களில் சுமார் 245 பாடல்கள் பாடியிருக்கிறார். ‘ஜிந்தகி ஏக் சஃபர் ஹைசுஹானா...’, ‘சலா ஜாதா ஹூன்..’ போன்ற பாடல்களில் ‘யோட்லிங்’ செய்து பாடியதும் ராஜேஷ் கன்னாவுக்குதான்.

பொதுவாக, பாடல் காட்சிகளில் ஓரிடத்திலாவது ராஜேஷ் கன்னா கண்களை மெல்ல மூடி, தலையை ரசிக பாவனையில் ஓர் அசை அசைப்பார் பாருங்கள், அத்தனை அழகாக இருக்கும்!

வெகு காலம் கழித்து, ஹேவல்ஸ்ஃபேன் விளம்பரங்களில் திடுமென ராஜேஷ் கன்னாவின் முதிய தோற்றத்தைப் பார்த்து மனம் மிக சங்கடப்பட்டது. பழைய துறுதுறுப்பு அகன்று ரொம்பவே தளர்ந்திருந்தார் ராஜேஷ் கன்னா.

வயது முதிர்ச்சியினாலும் தள்ளாமையினாலும் மும்பை, பாந்த்ரா பகுதியில் உள்ள லீலாவதி மருத்துவமனையில் அவர் அட்மிட் ஆனபோது ஒரு ரசிகனாக வருந்தினேன். தான் பூரண நலம் பெற்றுவிட்டதாகவும்,இரண்டு நாட்களில் டிஸ்சார்ஜ் ஆகி வந்துவிடுவேன்’ என்றும் அவரே அறிக்கை விட்டபோது மனம் கொஞ்சம் ஆறுதல் அடைந்தது. ஆனால், 2012-ம் ஆண்டு ஜூலை 18-ம் தேதி அவர் மரணமடைந்ததைக் கேள்விப்பட்டுத் துயருற்றது மனம்.

இன்று ராஜேஷ் கன்னாவின் 78-வது பிறந்த நாள். (29.12.2020)

 

 

0 comments: